Müasir məlumat saxlanması texnologiyalarında sərt disklər (HDD) əhəmiyyətli yer tutur. Helium harddisklər, məlumat mərkəzləri və yüksək tutumlu saxlama ehtiyacları üçün nəzərdə tutulmuş ən qabaqcıl texnologiyalardan biridir. Bu məqalədə helium harddisklərin texnologiyası, üstünlükləri, yaddaş tutumları və qiymət aralığı haqqında ətraflı şəkildə məlumat verəcəyik.

Helium harddisklər daxili mühitləri helium qazı ilə doldurulmuş sərt disklərdir. Helium, havadan 7 dəfə daha yüngül və daha az sıx olduğundan, diskin mexaniki komponentlərinin daha az müqavimətlə işləməsinə imkan verir. Bu da, performansın yaxşılaşdırılmasına, enerji sərfiyyatının azalmasına və daha çox yaddaş plitəsinin bir diskin içərisinə sığmasına şərait yaradır. Helium texnologiyası ilə hazırlanan yaddaş cihazlarında disklər hermetik şəkildə bağlanır və sızmanın qarşısını almaq üçün xüsusi texnologiyalar tətbiq edilir.

Helium Harddisklərin üstünlükləri

• Daha yüksək tutum – Helium texnologiyası ilə plitələrin sıxlığı artırmaq mümkündür. Hal-hazırda bu disklər 20TB-dan 24TB-a qədər böyük tutumlar təklif edir və gələcəkdə 30TB+ modellərin istifadəyə verilməsi gözlənilir.
• Daha az enerji sərfiyyatı – Heliumun sürtünmə müqavimətinin aşağı olmasından ötrü enerji sərfiyyatı əhəmiyyətli dərəcədə azalır. Bir çox Helium Harddisklər əməliyyat zamanı təxminən 7W qədər enerji sərfiyyatına malikdir.
• Daha az istilik və daha səssiz işləmə – Helium ilə dolu disklərin enerji sərfiyyatının daha az miqdarı istilik enerjisinə sərf olunur və hava ilə doldurulmuş disklərlə müqayisədə daha səssizdir.
• Uzunömürlülük və yüksək iş yükünə dayanıqlılıq  – Helium HDD-lər illik 550TB-a qədər iş yükünə dözə bilir və orta aralıq iş müddəti (MTBF) 2,5 milyon saat təşkil edir..

 Helium harddisklər əsasən böyük həcmli məlumat mərkəzlərində, bulud saxlama xidmətlərində və serverlərdə istifadə olunur.

Yaddaş tutumları aralığı

Helium harddisklərin yaddaş tutumları texnologiyanın inkişafı ilə getdikcə artır və hazırda ən böyük tutuma malik sərt disklər helium texnologiyasını istifadə edir. Hazırda mövcud maksimum tutum 30TB-a qədərdir.  Məsələn, Western Digital Ultrastar seriyası və Seagate Exos X modelləri 20 TB və yuxarı miqdarda tutumlara malikdir. Bu cür yüksək tutumlu Helium HDD-lər, əsasən, Məlumat mərkəzlərində və serverlerdə istifadə olunur.

Gələcəkdə isə tutumların 50TB və daha yuxarı səviyyələrə çatdırılması planlaşdırılır. HAMR(Heat-Assisted Magnetic Recording) və MAMR(Microwave-Assisted Magnetic Recording) kimi yeni texnologiyalar nəticəsində helium harddisklərin tutumlarını daha da artırmağın mümkün olacağı proqnozlaşdırılır.

Qiymət aralığı

Helium HDD-lərin qiymətləri əsasən tutum və texnologiya səviyyəsindən asılıdır. 10TB-18TB aralığında modellər üçün təxmini 300-500 ABŞ dolları təşkil edir. 20TB-lıq modellər üçün isə qiymətlər təxminən 600-700 ABŞ dolları ola bilər. Məsələn, Western Digital Gold 20TB modeli 679.99 ABŞ dolları qiymətinə satılır. 24TB modellərinin qiymətləri 570-650 ABŞ dolları intervalında dəyişir.  OptiNAND texnologiyasını ehtiva edən WD Gold 24TB diskləri bu kateqoriyaya daxildir.

Helium HDD-lərin hazırlanma texnologiyaları daha mürəkkəb olduğundan, məlumat itkisi zamanı bərpa prosesi də bir qədər məbləğ və uzun vaxt tələb edə bilər.  Sadə formatlama səhvləri, səhvən fayl silmə kimi problemlər üçün bərpa qiymətləri minimum 300 ABŞ dollarından başladığı halda, plitələrin zədələnməsi, hermetik sızma və ya yüksək səviyyədə şifrələnmiş məlumatların bərpası zamanı qiymətlər 2500 ABŞ dollarını keçə bilər. Bu cür işlər yüksək ixtisaslaşmış mühəndislər və xüsusi laboratoriya mühitləri tələb edir.

Helium harddisklər müasir saxlama texnologiyalarında əhəmiyyətli bir irəliləyişdir. Onların yüksək tutumu, enerji effektivliyi və uzunömürlülüyü bu texnologiyanı böyük həcmli məlumat ehtiyacları olan istifadəçilər üçün ideal seçim edir. Qiymətləri adi sərt disklərlə müqayisədə daha yüksək olsa da, təqdim etdikləri üstünlüklər onlara sərf edilən investisiyanı dəyərli edir.